Stichting Monumentenzorg Curaçao

Scharlooweg 13 – Curacao
click to enable zoom
Loading Maps
We didn't find any results
open map
View Roadmap Satellite Hybrid Terrain My Location Fullscreen Prev Next
Your search results

Presentashon di buki ‘Kura di Kuenta – Fleur de Marie’

Posted by juliette on October 17, 2022
| 0

Durante un presentashon di buki, djasabra 15 di òktober 2022, un grupo di (èks) habitante di Fleur de Maria a presentá algun di e historianan ku nan a skirbi den e buki ‘Kurá di Kuenta – Fleur de Marie’. E buki ta konsistí di kuenta i poesianan tokante di nan hubentut, den kua e bario di ‘Fleur de Marie’ a hunga e ròl prinsipal. Di e manera aki a reskatá i preservá un pida importante di e historia oral di Fleur de Marie, manera e relashon sosial entre e bario speshal aki i sobrá di Skalo, e konstrukshon i kaida di brùg Juliana i e aktividatnan i preokupashonnan diario di e bario.

Stichting Monumentenzorg Curaçao a tuma e inisiativa pa e proyekto aki i a enbolbí Wintertuin Curaçao pa guia e grupo i pa redaktá nan tekstonan. Esaki a tuma lugá bou di guia di Crisèn Schorea.

E grupo di habitantenan, ku nunka promé a yega di publiká, a kuminsá nèt promé ku e pandemia a kuminsá. Tabata un reto, pero finalmente a logra pa e grupo reuni di  un manera semi-online (hasiendo uso di zoom) pa por a sigui ku e seshonnan di skibimentu. Awor ku e buki a keda publiká i ta posibel pa topa en persona atrobe, nan a presentá e resultado pa nan famia, bisiña, amigu i konosínan den Sentro di Bario di Fleur de Marie. Na final di e presentashon a ofresé e outornan i diferente biblioteka di Kòrsou un eksemplar di e buki.

E eskritornan ta Franciska ‘Kika’ Florán-Gomez, Cornelia ‘Corichi’ Cicilia-Vlijt, Rustica ‘Ruth’ de Palm, Imeline ‘Lain’ Supriana, Iselyn ‘Girley’ Statius. Agatha ‘Aggie’ Gomez i Máximo ‘Max’ Martina. E publikashon aki a bira posibel ku sosten di Stichting Monumentenzorg Curaçao, Ministerio di OWCS i Vrienden Loterij Fonds. Un danki speshal ta bai pa NAAM pa por a hasi uso di nan espasio pa e seshonnan di skibimentu.

Fleur de Marie ta un bario masha uní – habitantenan nan por pleita bou di otro, pero si un hende di afó di bario bin buska problema ku un di nan, e ta buska problema ku tur. Esun ta hasi ko’i mala mucha hòrta limonada i e otro ta kinipí bisiña su bakiou. Un otro ta sufri un inmenso tristesa ora amiganan di bario kibra su pòpchi di karèt ku mama a kaba di regal’é. N’e otro banda nan ta hari hopi ku otro. Un ta kai pa un yònkuman di Scharloo pero e diferensia di klase sosial ta muchu grandi i ta pone ku e relashon no por bira algu.

Konstrukshon di brùg a nifiká progreso pero n’e mesun momentu fèrdrit, pasobra tres kuartu di e bario mester a muda pa traha lugá p’e konekshon fiho aki di  Otrobanda ku Punda. Ora ku el a tende e notisia ku brùg a kai, un di outornan ta laga hèmber di awa kai paso e mainta ei, su amigunan ku tabata traha rib’e konstrukshon di brùg a pasa kumind’é promé nan bai trabou. Un otro, tabata pará den balkon di su ruman ta mira kon huma ta lanta for di Punda i Otrobanda riba dia 30 di mei 1969. Un baka ta hui, bula den Waaigat pa despues kore rònt den bario, krea un konfushon total. Ku nan kuentanan i rekuerdonan, e ‘Yunan di Fleur de Marie’ aki, a duna koló na kapítulonan di historia di Kòrsou.

‘Kurá di Kuenta – Fleur de Marie’ a konta tambe ku redakshon final di Nifa Ansano i Lucille Berry-Haseth i ilustrashonnan di Rose-Ann Ignacio. E  ta un edishon limitá i lo no sali den e tiendanan di buki. Pa mas informashon por tuma kontakto ku Stichting Monumentenzorg Curaçao.

 

Leave a Reply

Your email address will not be published.