Willemstad – Stichting Monumentenzorg Curaçao a kuminsá un trayekto di mantenshon grandi na Lanthùis Kenepa fin di novèmber. Asina e organisashon aki ta antisipá riba e plannan di Fundashon Museo Tula (FMT) pa bolbe habri Museo Tula den 2023.
Museo Tula a sera despues ku Kas di Kultura a bai fayit na 2020. For di e dia ei e lanthùis ta pará bashí. Pa kasi dos aña e inventario a keda bou di kòntròl di e curator. Esei a logra di drenta den un areglo ku Ministerio OWCS pa kumpra esaki. Hasiendo un invershon di 200.000 florin di fondonan ku e mes a generá, Monumentenzorg ta demonstrá su konfiansa den e plannan di FMT. Esaki ta keda usá pa, entre otro, drecha sker den muraya, fèrf paden i pafó, drecha strukturanan di palu, egalisá e flur hel di piedra di IJssel i un revishon total di e instalashon di koriente.
“Pa dos aña i mei kaba nos no a haña entrada di hür na Lanthùis Kenepa,” Marcel Dennert, direktor di Monumentenzorg Curaçao ta splika, “pero e gastunan – entre otro e gastunan di mantenshon – si a sigui kore normal.” Pa sòru ku e lanthùis ta kla pa Museo Tula por us’é mas pronto posibel, e fundashon Monumentenzorg a disidí pa no warda fondonan pa hasi esaki bira disponibel, pero pa tuma tuma e inisiativa di generá su propio fondonan pa kuminsá ku e trayekto di mantenshon. “Ta un invershon substanshal, i p’esei nos ta spera pa por firma un kòntrakt ku esnan ku ke usa e lanthùis den futuro.” Stichting Monumentenzorg Curaçao ta enfatisá ku e ta pará kompletamente tras di e plannan di FMT i ku e ta haña ku Museo Tula den un forma mas moderno i interaktivo lo ta un funshon ideal pa Lanthùis Kenepa.
Fin di novèmber e trabounan a kuminsá ku e intenshon pa nan ta kla pa mas tardá na mart 2023.
E kondishonnan kruel na Plantashon Kenepa a pone ku Tula i algun di su kompañeronan kier a bai Willemstad pa hasi un apelashon pa nan libertat serka e gobièrnu na Willemstad. 17 di ougùstùs 1795 mas o ménos 40-50 hende sklabisá a sali na pia for di Kenepa. Den e siguiente luna mas i mas hende di e otro plantashonnan na Banda’bou a djòin e grupo. Riba 19 di sèptèmber Tula a keda traishoná i a kai sera, loke a pone un fin na e rebelion. Tula, Bastiaan Carpata i Pedro Wacao a wòrdu mata públikamente 3 di òktober 1795. A tuma 68 aña mas pa eliminá sklabitut ofisialmente na 1863. Ora Hulanda a pidi pordon pa sklabitut, el a anunsiá ku e ta bai rehabilitá Tula.