Your search results

Lánthùisnan di Kòrsou

Posted by juliette on December 14, 2019
| 3 Comments

Pa por mira e buki Lánthùisnan di Kòrsou digital, por fabor klik riba e link akibou;

Lánthùisnan di Kòrsou

Prenda presioso di pasado

E buki Lánthùisnan di Kòrsou ta e promé buki ku ta duna un bista kompletu di tur lánthùisnan di Kòrsou – tantu di esnan ekstistente komo di esnan ku ya no t’ei mas. Ademas di un kantidat grandi di potrèt di e lánthùisnan i eksperensha di esnan ku a biba akiden, tambe tin atenshon pa historia i arkitektura.

Duivelsklip, Groot Sta. Martha, Brievengat – ta djis algun nòmber di lánthùisnan ku ta kishikí nos imaginashon. Nos isla konosé mas di shen di e lánthùisnan aki, rekuerdonan di plantashi i kas na kunuku. E forma di konstrukshon ta úniko na mundu: un estilo Europeo, mayoria di biaha Hulandes, adaptá na nos sirkunstansha tropikal i material di konstrukshon disponibel. Pater Paul Brenneker ta papia kla tokante historia di e lánthùisnan aki:

Mi ta atmirá e lánthùisnan pa nan estilo, eimes mi ta odia nan pasobra nan ta monumento di krueldat lantá ku trabou fòrsá i halá di zjuip’

DESTINO NOBO

Den delaster dékadanan a restaurá hopi di e lánthùisnan i hopi biaha nan a haña funshon i konstrukshonnan moderno den banda. Algun ta sirbi ketu bai komo kas pa biba, otronan awor ta albergá, restorant, hotèl, museo, biblioteka òf kantor.

E buki ta mustra e variedat grandi pero tambe e estado ku e lánthùisnan ta na e momentu aki: for di dekadensia i ruina te kuido intensivo, tin biaha ku ekstenshonnan hipermoderno. Di kas na kunuku simpel te kas di plantashi den tur su grandesa.

TOKANTE E FOTOGRAFONAN

Ton Verkuijlen ya tin diferente buki di fotografia riba su nòmber manera, Pietermaai 1715-2015.

Brett Russel a haña rekonosimentu pa motibu di su retratonan pa entre otro Joods Historisch Museum na Amsterdam. Entre nan dos nan a fotografiá tur e 78 lánthùisnan eksistente.

TOKANTE E ESKRITORNAN

E periodista Jeannette van Ditzhuijzen a indagá den histroria di hopi diferente lánthùis i a sa di trese dilanti hopi hecho i anekdotanan. Van Ditzhuijzen a publiká diferente buki tokante Kòrsou serka LM Publishers, manera Geschiedenis in Steen i Kas di Shon. Arkitekto Michael Newton a skibi tokante historia i arkitektura di e lánthùisnan kaminda el a pone atenshon tambe na e kultura di plantashi, materialnan i estilo di konstrukshon. François van der Hoeven i e Werkgroep Archeologie Curaçao a investigá, deskribí i saka potrèt di mas di setenta ruina i fundeshi di lánthùisnan ku a bai pèrdí. Carel de Haseth a entrevistá (èks) habitantenan di diferente lánthùis: Daisy, Andrés i Pedro Casimiri, Marcel van Henneigen, Bob Pinedo, Stella Sprockel i Chris Winkel.

FUNDASHON CURAÇAO STYLE

Fundashon Curaçao Style ta publiká e buki Lánthùisnan di Kòrsou na okashon di nan di binti aña di eksistensha. Meta di e fundashon ta pa hasi e herensia kultural di Kòrsou konosí, tantu pa medio di palabra komo imagen.

LM PUBLISHERS

Ta un kas editorial independiente ku buki tokante arte i kultura rònt mundu, informashon tokante pueblonan indígeno, durabilidat i e problemátika di desaroyo. Nan tin interes speshal pa Surinam, eks-Antianan i Indonesia.

DATONAN DI E BUKI

Lánthùisnan di Kòrsou, Prenda Presioso di Pasado (ISBN 978460225284) 

Fotografia: Ton Verkuijlen, Brett Russel e.a. l Teksto: Jeannette van Ditzhuijzen, Michael Newton, François van der Hoeven i Carel de Haseth | LM Publisher huntu ku Fundashon Curaçao Style

E buki ta na Hulandes Landhuizen van Curaçao – Juwelen uit het Verleden (ISBN 9789460225116)

Na Ingles Plantation Houses of Curaçao – Jewels of the Past (ISBN 9789460225253)

3 thoughts on “Lánthùisnan di Kòrsou

  • Pingback: Vervallen landhuis | blog

  • Mavis Thielman
    on December 16, 2019

    Di bèrdat un prenda di un buki. Tremendo trabou. Pabien!!
    Unda por kumpra e bukinan aki?

    • juliette
      on December 16, 2019

      E version na Ingles ku Hulandes ta na bente na e librerianan. Si ta desea un version di print na Papiamentu, por ehempel pa huso na skol, por tuma kontakto ku LM Publisher.

Leave a Reply

Your email address will not be published.